"Të gjitha rrugët të cojnë në Shkodër"

Uji që sot po mbyt Shkodrën për të disatën herë brenda një viti, po tregon sërish që jemi një shtet diletant dhe i paorganizuar për të tilla qamete. Kryetarja e Parlamentit, për fat ende banore e Shkodrës, para dy ditësh u hakërrehej deputetëve të opozitës se ata, pozita, janë në ballë të aksionit për evakuim. Por kjo nuk është se e zgjidh këtë cështje. Situata qëndron aty stoike dhe e dhimbshme, për të gjithë ata që po e vuajnë aktualisht këtë tragjedi. Qytetarët e Shkodrës. Kjo situatë na nxjerr edhe një herë në breg të detit stuhinë që vazhdon ta kemi ndër vedi. Sikur Migjeni apo ndonjë Migjen tjetër i ngjashëm me të do të ishte gjallë do të thërriste fort: "Ah si s’kam një grusht të fortë!". 

Ka një shprehje simbolike në gjithë këtë katrahurë përpara ardhjes së krishtlindjeve dhe vitit të ri. Ato ditë të mbushura me frymë shprese dhe lutje për lumturi dhe begati. Vecse nën ujë këtë rradhë. Të gjitha rrugët të cojnë në Shkodër! Edhe të gjitha ujërat e HEC-eve më të mëdhenjë të vendit. Ato që prodhojnë energji elektrike pa fund dhe paratë nuk e dimë se ku shkojnë. Dhe për më tepër ende jemi pa drita. E pra të përmbytesh nga prurjet e shumta, duke mos patur drita njëkohësisht, kjo është një tragjedi më vete. Po ndiqja dje në një nga mediat që pretendon se po monitoron situatën, Ministrin e Mbrojtjes. Mirë deri këtu por fakti që kërkon ndihmë prej NATO-s, duke qenë vend anëtar i saj është një tragjedi më vete. U mundova të zë veshët dhe mos të dëgjoja deklarata të tjera të papërgjegjshme të ministrit të rradhës. Pas asaj të kthimit të eshtrave të Ismail Qemalit, kjo e dyta më e fortë në vetëm pak kohë. Të jesh vend anëtar i NATO-s dhe të mos menaxhosh dot as situata të tilla, jo natyrore do të thotë dështim. Kanë dështuar masat emergjente të efektivave, që ju i quani të afta për misione paqeruajtëse si në Afganistan, Bosnje apo Irak. E pra kur nuk keni mjete dhe trupa të nevojshme, për t’i ardhur në ndihmë vetëm një qyteti, cdo të mendonim nëse vendin e godiste një ciklon, tornado apo uragan. Mendoni se me 10 kamiona dhe 20 ushtarë, zgjidhet halli në Shkodër? Të pretendosh dhe t’i mëshosh fort faktit, madje edhe të festosh si vend anëtar i NATO-s, do të thotë të jesh i përgatitur për cdo lloj situate. Mendoni ju se vendet e tjera të NATO-s nuk e dinë se përse mbytet sërish Shkodra? 

Zëvendësimi i specialistëve të HEC-eve, atyre të argjinaturave dhe deri tek ata të tokave me militantë, vecanërisht në një zonë si Shkodra e lidhur me të djathtën prej vitesh, ka sjellë këtë situatë. As më shumë e as më pak se sa flakja në rrugë e njerëzve të aftë, dhe punësimi partiak i personave të papërgjegjshëm, madje edhe në shërbimet sinoptikane. Prishja e kanaleve dhe të gjithë infrastrukturës ujore të një qyteti dhe të rrethinave të tij, nuk i shuan dot aspak hamendësitë se përse shkodranët preferuan të ndërtojnë anës lumit, apo ndanë liqenit.

Elementë të tjerë që i vishen rastësisë se përse të gjitha rrugët të cojnë në Shkodër, ka pafund. Mjafton të përmendësh sigurimin dhe dëmshpërblimin që shteti apo kompanitë private duhet të bënim në këto momente. Sapo plasi Gërdeci për të shpëtuar shumë e shumë gjëra nga kjo histori, u tha direkt se do të ketë kompesim për qytetarët. Po për shkodranët që sot po humbasin gjithcka kanë prej ujit, pasi një gjyle plas dhe nuk vazhdon më të bucasë, cdo të ketë. Për të mos folur për grabitësit që po përfitojnë nga fjetja e shtetit për të kontrolluar qoftë edhe me barka të marra me qera cdo lagje nga ato pak lagje sic pretendojnë. Uji dhe të gjitha problemet shëndetësore që pasojnë, janë të panumërta. Mjafton të përmendim ato të mushkrive, lagështirën dhe gjithcka tjetër e ngjashme me të, që o t’i bëjë qytetarët shkodranë të jenë të rrezikuar në cdo cast. Për të mos vazhduar me epideminë që po rrezikon realisht qytetin. 

Nuk ka shtet në Europë që këtë dukuri nuk do ta shikonte me shqetësim. Ka shumë raste që pozita akuzon opozitën se po i prish punë duke folur keq për të tek Europa. Sot opozita shqiptare ka të drejtë të bërtasë, ulërasë, të cirret më shumë se të gjitha herët e tjera. Mendoni se si do të udhëtojnë shkodranët mbas datës 15 dhjetor, dita e parë e shqiptarëve pa viza, me epidemi. E kam thënë në cdo rast që shqiptarët e sëmurë dhe me probleme shëndetësore, e shqetëson më shumë Europën se sa krimi, droga apo prostitucioni. Kam frikë së në këtë rast do ta paguajmë të gjithë. Pastaj ka të drejtë qeveria të shpallë gjendjen e katastrofës natyrale. Po prej një epidemie që e kishim vërtet në dorë ta zgjidhnim në kohë.

Me kushte higjeno-sanitare skandaloze në sajë të papërgjegjshmërisë së politikave të shëndetësisë për guiness në këtë millenium të ri, e sigurt që një ditë do të katandisemi në lavra laboratorike. Sot Shkodra është pa ujë dhe pa drita. Pa ujë sepse edhe nëse do të ketë ujë ai do të ishte i zi, katran me bojë. Sa muaj duhen që uji të kryejë ciklin e plotë të dizifektimit dhe deri në përdorim. Pa drita sepse cdo masë do të sillte tjetër tragjedi dhe me përmasa akoma më të mëdha. Pra sot Shkodra po jeton ditët e saj më të këqija dhe ndaj të gjitha rrugët sot të cojnë në Shkodër.